По половина век муралот што се наоѓа на зградата над “Телеком”, во центарот на Гевгелија, повторно е обновен.

Обновата на сликата која со децении ја красеше не само оваа зграда, туку и центарот на градот беше извршена во рамките на фасадирањето на зградите на шеталиштето во центарот на градот. Обновата на муралот се одвиваше под ликовен надзор на гевгелискиот академски сликар Боро Петров, кој беше и еден од авторите на муралот, а ја изведоа млади ликовни уметници од Гевгелија.
Муралот на зградата во која порано се наоѓаше РТГ, е насликан во далечната 1959 година, по повод Општинскиот празник-7 Ноември и предавањето во употреба на првата продавница за самопослужување во Гевгелија.
На вториот кат од оваа зграда била сместена првата Стоковна куќа во Гевгелија, поради што на муралот доминирале слики кои ја одразувале понудата на стоковната куќа на трговското претпријатие “Солун”.
Автори на муралот биле гевгелиските академски сликари Боро Петров и Зафир Хаџимитров.